मंगरूळ- ईटकळ रोडवर पवनचक्की पाते वाहतुकीदरम्यान एक लाखांची खंडणी मागणी, रोख रक्कम लुटली- दोन जणांविरुद्ध तुळजापूर पोलिसांत गुन्हा दाखल-
Tuljapur Crime News
📍 धाराशिव | प्रतिनिधी
तुळजापूर तालुक्यातील मंगरुळ इटकळ रोडवर दत्त मंदिरासमोर भरदिवसा घडलेल्या घटनेने परिसरात खळबळ उडाली आहे. पवनचक्कीचे पाते वाहून नेणाऱ्या वाहनाला अडवून चालकाला मारहाण करत एक लाख रुपयांची खंडणी मागण्यात आली, तसेच खिशातील रोख रक्कम जबरदस्तीने हिसकावून नेल्याची धक्कादायक घटना घडली आहे.
याबाबत पोलिसांकडून मिळालेली अधिक माहिती अशी की, तुळजापूर पोलीस ठाण्यात दाखल फिर्यादीनुसार, फिर्यादी रामेश्वर शिवानंद तानवडे (वय 38, रा. आरळी बु., ता. तुळजापूर, जि. धाराशिव) हे दि. 1 एप्रिल 2026 रोजी दुपारी सुमारे 3 वाजता मंगरुळ इटकळ रोडवरील दत्त मंदिरासमोरून पवनचक्कीचे पाते घेऊन जात होते. यावेळी आरोपी गणेश सरडे व भाऊसाहेब सरडे (दोघे रा. सरडेवाडी, ता. तुळजापूर) हे मोटारसायकलवर येऊन त्यांनी पाते वाहून नेणाऱ्या वाहनासमोर गाडी आडवी लावून वाहन थांबवले.
यानंतर “तू आमच्या हद्दीतून गाडी कशी नेत आहेस” असा दम देत आरोपींनी एक लाख रुपयांची मागणी केली. फिर्यादीने विरोध केला असता आरोपींनी शिवीगाळ करत लाथाबुक्क्यांनी व बेल्टने मारहाण केली. तसेच फिर्यादीच्या खिशातील सुमारे 5 हजार रुपये जबरदस्तीने काढून घेतल्याचा आरोप आहे.
या प्रकरणी फिर्यादीच्या तक्रारीवरून तुळजापूर पोलीस ठाण्यात आरोपींविरुद्ध भारतीय न्याय संहितेच्या कलम 309(2) व 308(2) अन्वये गुन्हा नोंद करण्यात आला आहे. पुढील तपास पोलीस करत आहेत.
या घटनेमुळे परिसरात भीतीचे वातावरण
भरदिवसा घडलेल्या या प्रकारामुळे स्थानिकांमध्ये भीतीचे वातावरण निर्माण झाले असून, अशा प्रकारांवर आळा घालण्यासाठी पोलिसांनी कडक कारवाई करावी, अशी मागणी नागरिकांकडून होत आहे.
0 Comments