धक्कादायक घटना :तुळजापूरात जेवण वाढताना महिला भाविकांवर हल्ला; सोन्याची माळ व रोख रक्कम लुटली-Tuljapur Crime

धक्कादायक घटना :तुळजापूरात जेवण वाढताना महिला भाविकांवर हल्ला; सोन्याची माळ व रोख रक्कम लुटली-Tuljapur Crime 

तुळजापूर | प्रतिनिधी : तुळजापूर येथील घाटशिळ पार्किंगजवळील 108 भक्त निवासात घडलेल्या धक्कादायक प्रकारामुळे परिसरात खळबळ उडाली आहे. जेवण वाढण्याच्या कामात गुंतलेल्या महिलांवर चार अनोळखी इसमांनी अचानक हल्ला करत मारहाण केली आणि त्यांच्याकडील सोन्याची माळ तसेच रोख रक्कम जबरदस्तीने हिसकावून नेल्याची घटना समोर आली आहे.

पोलीसांकडून मिळालेल्या माहितीनुसार, फिर्यादी शुभम बजरंग लांडे (वय 22, रा. बिबेवाडी, पुणे) हे तसेच ऐश्वर्या सोजवळ, सरोजा पांढरे, पायल लांडे, आरती भोसले आणि अपंग महिला श्रद्धा भोंगळे हे सर्वजण दि. 2 एप्रिल 2026 रोजी सायंकाळी सुमारे 5 वाजण्याच्या सुमारास 108 भक्त निवासातील हॉल क्रमांक 4 समोर जेवण वाढण्याचे काम करत होते.

याचवेळी चार अनोळखी इसमांनी तेथे येऊन अचानक शिवीगाळ करत लोखंडी पाईप, पाण्याचे जार आणि स्टीलच्या भांड्यांचा वापर करून संबंधितांवर हल्ला केला. या मारहाणीत काहीजण जखमी झाले.

हल्लेखोरांनी सरोजा पांढरे यांच्या गळ्यातील सुमारे 3 ग्रॅम वजनाची सोन्याची माळ जबरदस्तीने हिसकावून घेतली. तसेच सोहेब तांबोळी यांच्या शर्टाच्या खिशातील 5,000 रुपये रोख रक्कमही लुटून आरोपी तेथून पसार झाले.

या प्रकरणी शुभम लांडे यांनी दिलेल्या फिर्यादीवरून तुळजापूर पोलीस ठाण्यात अज्ञात चार इसमांविरुद्ध भा.न्या.सं. कलम 309(6), 74 तसेच अपंग व्यक्ती अधिकार अधिनियम कलम 92 अन्वये गुन्हा नोंदवण्यात आला आहे.

पोलीस आरोपींचा शोध घेत असून, या घटनेमुळे तुळजापूर परिसरात भीतीचे वातावरण निर्माण झाले आहे.