मॅंगो ज्यूसमधून गुंगीचे औषध देऊन अत्याचार; व्हिडिओ व्हायरलची धमकी, तिघांविरोधात ॲट्रॉसिटीसह गुन्हा-Crime New

परंडा, प्रतिनिधी : परंडा तालुक्यातील एका गावात 24 वर्षीय तरुणीवर वेगवेगळ्या ठिकाणी तिघांनी लैंगिक अत्याचार केल्याची धक्कादायक घटना समोर आली आहे. पीडितेला गुंगी आणणारे पेय देऊन अत्याचार करण्यात आला असून त्याचे छायाचित्रीकरण करून व्हिडिओ व्हायरल करण्याची धमकी दिल्याचा गंभीर आरोप फिर्यादीत करण्यात आला आहे. या प्रकरणी परंडा पोलिसांनी तिघांविरोधात बलात्कार, धमकी आणि ॲट्रॉसिटी कायद्यान्वये गुन्हा दाखल केला आहे.

पोलिसांनी दिलेल्या माहितीनुसार, पीडित 24 वर्षीय तरुणी 25 मे 2026 रोजी दुपारी घरी असताना गावातील एका तरुणाने मोबाईल चार्जिंगला लावण्याचे कारण सांगून तिच्याशी संपर्क साधला. त्यानंतर तिला मॅंगो ज्यूस दिला. ज्यूस पिल्यानंतर तरुणीला झोप येऊ लागली. याच संधीचा फायदा घेत आरोपीने तिच्यावर लैंगिक अत्याचार केल्याचा आरोप आहे.

तसेच अत्याचाराचे छायाचित्रीकरण करून पीडिता शुद्धीवर आल्यानंतर "ही बाब कोणाला सांगितल्यास व्हिडिओ सोशल मीडियावर व्हायरल करेन" अशी धमकी दिल्याचे फिर्यादीत नमूद करण्यात आले आहे.

यानंतर गावातील दुसऱ्या एका तरुणाने पीडितेच्या घरी जाऊन तिच्यावर लैंगिक अत्याचार केल्याचा आरोप करण्यात आला आहे. तसेच 3 जून 2026 रोजी दुपारी सुमारे 4 वाजण्याच्या सुमारास तिसऱ्या आरोपीने पीडितेला त्याच्या घरी नेऊन तिच्यावर लैंगिक अत्याचार केल्याचे फिर्यादीत म्हटले आहे.

या सर्व प्रकारामुळे मानसिक धक्का बसलेल्या पीडितेने 5 जून 2026 रोजी परंडा पोलीस ठाण्यात तक्रार दाखल केली. तिच्या प्रथम खबरीवरून पोलिसांनी संबंधित तिघांविरुद्ध भारतीय न्याय संहिता (BNS) कलम 64(1), 64(2), 77, 123, 333, 351(2) तसेच अनुसूचित जाती-जमाती अत्याचार प्रतिबंधक कायदा कलम 3(2)(व्हीए) अन्वये गुन्हा नोंदवला आहे.