लग्नाचे आमिष दाखवून ७ वर्षे लैंगिक शोषण; जातीवाचक शिवीगाळ व जीवे मारण्याची धमकी, गुन्हा दाखल-Dharashiv Crime News Live
धाराशिव, दि. २ जून – लग्न करण्याचे आमिष दाखवून तब्बल सात वर्षे एका ३७ वर्षीय महिलेवर लैंगिक अत्याचार केल्याचा धक्कादायक प्रकार उघडकीस आला आहे. याप्रकरणी धाराशिव शहर पोलीस ठाण्यात एका तरुणाविरुद्ध बलात्कार, फसवणूक, धमकी तसेच अनुसूचित जाती-जमाती अत्याचार प्रतिबंधक कायद्यान्वये गुन्हा दाखल करण्यात आला आहे.
पोलिसांकडून मिळालेल्या माहितीनुसार, एका गावातील ३७ वर्षीय पीडित महिलेने (नाव व गाव गोपनीय) दिलेल्या फिर्यादीत म्हटले आहे की, आरोपीने सन २०१९ पासून तिच्याशी जवळीक साधत लग्न करण्याचे आश्वासन दिले. तसेच तिच्या मुलांचा सांभाळ करणार असल्याचे सांगून तिचा विश्वास संपादन केला. या विश्वासाचा गैरफायदा घेत आरोपीने तिच्यावर वारंवार लैंगिक अत्याचार केल्याचा आरोप फिर्यादीत करण्यात आला आहे.
फिर्यादीनुसार, पीडित महिलेने लग्नाबाबत विचारणा केल्यानंतर आरोपीने टाळाटाळ केली. याच काळात त्याने जातीवाचक शिवीगाळ करून अपमानित केले. तसेच, “पोलीसांकडे तक्रार केल्यास जीवे मारून टाकीन,” अशी धमकी दिल्याचाही आरोप करण्यात आला आहे.
पीडितेने दि. १ जून २०२६ रोजी दिलेल्या प्रथम खबरेच्या आधारे धाराशिव शहर पोलीस ठाण्यात आरोपीविरुद्ध भारतीय न्याय संहिता (BNS) कलम ६४(१), ६४(२), ६९, ३५१(२) तसेच अनुसूचित जाती व जमाती (अत्याचार प्रतिबंधक) कायदा कलम ३(१)(डब्ल्यु)(i)(ii), ३(१)(आर) व ३(१)(एस) अन्वये गुन्हा नोंदविण्यात आला आहे.
या प्रकरणाचा पुढील तपास पोलीस अधिकारी करीत असून आरोपीच्या अटकेसाठी हालचाली सुरू असल्याची माहिती पोलिसांकडून देण्यात आली.
0 Comments