नायगाव येथील लॉजवर पोलिसांचा धडक छापा; अनैतिक देहव्यापार प्रकरणात दोघांवर गुन्हा, दोन महिलांची सुटका-Royal Lodge Red News
धाराशिव /प्रतिनिधी : अवैध धंद्यांवर कारवाईचा धडाका सुरू ठेवत शिराढोण पोलीस पथकाने नायगाव शिवारातील एका लॉजवर छापा टाकून कथित अनैतिक देहव्यापाराचा पर्दाफाश केला. या कारवाईत दोन महिलांची सुटका करण्यात आली असून दोन आरोपींविरुद्ध गुन्हा दाखल करण्यात आला आहे. तसेच रोख रक्कम, मोबाईल फोन, नोंदीचे रजिस्टर व इतर साहित्य जप्त करण्यात आले आहे.
पोलीस अधीक्षक रितु खोखर व अपर पोलीस अधीक्षक सचिन पांडकर यांच्या मार्गदर्शनाखाली शिराढोण पोलीस ठाण्याचे सहाय्यक पोलीस निरीक्षक कोळेकर यांच्या पथकाने दि. ११ जून २०२६ रोजी परिसरात गस्त व अवैध धंद्यांबाबत माहिती संकलन मोहीम सुरू ठेवली होती.
दरम्यान, गुप्त बातमीदारामार्फत नायगाव ते मुरुड मार्गावरील रॉयल लॉज येथे महिलांकडून अनैतिक देहव्यापार सुरू असल्याची माहिती पोलिसांना मिळाली. माहितीची खातरजमा करण्यासाठी पोलिसांनी बनावट ग्राहक पाठवून पडताळणी केली. माहितीची पुष्टी झाल्यानंतर सायंकाळी सुमारे ६.१६ वाजता संबंधित लॉजवर धडक कारवाई करण्यात आली.
छाप्यात लॉजमध्ये दोन महिला आढळून आल्या. महिला पोलिसांमार्फत चौकशी केल्यानंतर संबंधित महिलांना व्यावसायिक उद्देशाने आश्रय देऊन लैंगिक शोषणासाठी प्रवृत्त केले जात असल्याची माहिती समोर आल्याचे पोलिसांनी सांगितले.
या प्रकरणी आरोपी अक्षय दादासाहेब घोगरे (रा. मुरुड, ता. जि. लातूर) व लॉज व्यवस्थापक अजय अच्युत रसाळ (रा. मुरुड, ता. जि. लातूर) यांना ताब्यात घेण्यात आले. त्यांच्या ताब्यातून मोबाईल फोन, नोंदवही, रोख रक्कम ५ हजार ३०० रुपये तसेच इतर साहित्य असा एकूण १५ हजार ४२० रुपयांचा मुद्देमाल जप्त करण्यात आला.
पोलिसांनी संबंधित महिलांची सुटका करून आरोपींविरुद्ध गुन्हा क्र. १४१/२०२६ अंतर्गत बीएनएस तसेच मानवी अनैतिक व्यवसाय प्रतिबंधक अधिनियमातील संबंधित कलमांनुसार तामलवाडी पोलीस ठाण्यात दि. ११ जून २०२६ रोजी गुन्हा नोंद केला आहे.
या कारवाईबद्दल परिसरात चर्चा सुरू असून अवैध धंद्यांविरोधातील पोलिसांच्या कारवाईचे स्वागत होत आहे. शिराढोण पोलीस पथकाने ही कारवाई यशस्वीपणे पार पाडली.
0 Comments