नांदेड जिल्ह्यात भूकंपाचे सौम्य धक्के; रिश्टर स्केलवर 4.7 तीव्रता, प्रशासनाचे सतर्कतेचे आवाहन-Nanded earthquake
हिंगोलीतील वसमत तालुक्यात केंद्रबिंदू; कोणतीही जीवितहानी नाही, नागरिकांनी अफवांपासून दूर राहावे
नांदेड, दि. ११ एप्रिल : नांदेड जिल्ह्यात शनिवारी सकाळी भूकंपाचे सौम्य धक्के जाणवले असून नागरिकांमध्ये काही काळ भीतीचे वातावरण निर्माण झाले. सकाळी 08:45 वाजण्याच्या सुमारास नांदेड शहरासह अर्धापूर, हदगाव, हिमायतनगर या तालुक्यातील काही गावांमध्ये जमिन हादरल्याचा आणि भूगर्भातून आवाज आल्याचा अनुभव नागरिकांनी घेतला.
या घटनेची माहिती मिळताच प्रशासन सतर्क झाले. राष्ट्रीय भूकंप विज्ञान केंद्राच्या नोंदीनुसार या भूकंपाची तीव्रता रिश्टर स्केलवर 4.7 इतकी नोंदविण्यात आली आहे. या भूकंपाचा केंद्रबिंदू हिंगोली जिल्ह्यातील वसमत तालुक्यातील शिरली गावाच्या उत्तरेला असल्याचे स्पष्ट झाले आहे.
प्रशासनाने दिलेल्या माहितीनुसार हा धक्का सौम्य स्वरूपाचा असून सुदैवाने कोणतीही जीवित किंवा वित्तहानी झालेली नाही. संबंधित तहसीलदारांनी जिल्हा आपत्कालीन कार्यकेंद्रास याबाबत अहवाल सादर केला आहे.
दरम्यान, नांदेड जिल्ह्याचे पालकमंत्री अतुल सावे यांनी परिस्थितीवर लक्ष ठेवले असून प्रशासनाशी सतत संपर्कात असल्याचे सांगितले. नागरिकांनी घाबरून न जाता सतर्क राहावे, असे आवाहन त्यांनी केले आहे.
जिल्हाधिकारी राहुल कर्डिले यांनीही नागरिकांना आवाहन करताना सांगितले की, कोणत्याही अफवांवर विश्वास ठेवू नये आणि अधिकृत माहितीवरच भरोसा ठेवावा.
सुरक्षिततेसाठी महत्त्वाच्या सूचना:
- पत्र्याच्या छतावर ठेवलेले दगड तातडीने काढून टाकावेत
- छत सुरक्षित करण्यासाठी पत्रे बोल्टने व्यवस्थित बसवावीत
- पुन्हा धक्का जाणवल्यास त्वरित घराबाहेर मोकळ्या जागेत जावे
- कोणतीही आपत्कालीन परिस्थिती असल्यास (02462) 235077 या क्रमांकावर संपर्क साधावा
एकूणच, भूकंपाचा धक्का सौम्य असला तरी प्रशासनाने नागरिकांना सतर्क राहण्याचे आवाहन केले असून परिस्थितीवर बारकाईने लक्ष ठेवले जात आहे.
0 Comments