अहिल्यानगर : पारनेर तालुक्यात कीर्तनकाराकडून अल्पवयीन मुलीवर अत्याचार; ‘भोंदू महाराज’ अटकेत, २० मार्चपर्यंत पोलीस कोठडी-Ahilyanagar. Crime News Update
अहिल्यानगर : पारनेर तालुक्यातील ढवळीपूर गावात वारकरी संप्रदायाच्या लौकिकाला धक्का देणारी धक्कादायक घटना उघडकीस आली आहे. येथील एका कीर्तनकाराने १७ वर्षीय अल्पवयीन मुलीचे गेल्या पाच वर्षांपासून लैंगिक शोषण केल्याचा गंभीर प्रकार समोर आला असून या घटनेमुळे संपूर्ण पारनेर तालुक्यात खळबळ उडाली आहे.
या प्रकरणी श्री दुर्गादेवी वारकरी शिक्षण संस्थेचा अध्यक्ष आणि कीर्तनकार यशवंत एकनाथ थोरात उर्फ अण्णासाहेब गुंजाळ (महाराज) (वय ३८) याला पारनेर पोलिसांनी अटक केली आहे. न्यायालयाने आरोपीला २० मार्चपर्यंत पोलीस कोठडी सुनावली असून पुढील तपास सुरू आहे.
पाच वर्षांपासून अत्याचाराचा आरोप
मिळालेल्या माहितीनुसार, पीडित मुलगी इयत्ता आठवीत शिकत असतानापासून आरोपी तिच्यावर अत्याचार करत होता. आरोपी आणि पीडितेचे कुटुंब शेजारी राहत असल्याने दोन्ही कुटुंबांत घरोब्याचे संबंध होते. पीडितेचा भाऊ आरोपीच्या वारकरी शिक्षण संस्थेत सचिव म्हणून कार्यरत असल्याने आरोपीने त्याचाच फायदा घेत मुलीवर वाईट नजर ठेवली.
मुलगी घरी एकटी असताना किंवा आरोपीच्या घरी कोणी नसताना त्याने वारंवार तिच्यावर जबरदस्तीने शरीरसंबंध प्रस्थापित केल्याचा आरोप फिर्यादीत करण्यात आला आहे.
धमक्या देऊन गप्प ठेवले
पीडितेने विरोध करण्याचा प्रयत्न केल्यास आरोपी तिला जीवे मारण्याची धमकी देत होता. “मी दोन हाफ मर्डर केले आहेत, कोणाला सांगितले तर तुझ्या आई-वडिलांना आणि भावालाही मारून टाकीन,” अशी धमकी देत तो मुलीला भीती दाखवत असल्याचे तक्रारीत नमूद आहे. कुटुंबाच्या सुरक्षिततेच्या भीतीने पीडित मुलगी दीर्घकाळ हा छळ सहन करत होती.
गरम पक्कडीने चटके देऊन मारहाण
१० मार्च २०२६ रोजी या प्रकाराने गंभीर वळण घेतले. आरोपीने मुलीला फोन करून घरी बोलावले. ती उशिरा आल्याचे कारण देत आरोपीने तिला कॉम्प्युटर रूममध्ये नेऊन बांबू व चापटांनी बेदम मारहाण केली. त्यानंतर स्वयंपाकघरातील लोखंडी पक्कड गॅसवर गरम करून मुलीच्या शरीरावर चटके दिल्याचा आरोप आहे. या अमानुष मारहाणीनंतरही आरोपीने तिच्यावर जबरदस्तीने अत्याचार केल्याचे फिर्यादीत म्हटले आहे.
भावासमोर उघड झाला प्रकार
मारहाण व चटक्यांमुळे मुलीला चालणेही कठीण झाले होते. १४ मार्च रोजी तिचा भाऊ घरी आल्यानंतर त्याने बहिणीची गंभीर अवस्था पाहून चौकशी केली. विश्वासात घेतल्यानंतर मावस भावांच्या उपस्थितीत पीडितेने गेल्या पाच वर्षांपासून होत असलेला छळ सांगितला.
यानंतर पीडितेच्या भावाने पारनेर पोलीस ठाण्यात तक्रार दाखल केली.
पोस्को आणि बीएनएस अंतर्गत गुन्हा
तक्रारीच्या आधारे पोलिसांनी आरोपी यशवंत थोरात उर्फ अण्णासाहेब गुंजाळ याच्याविरोधात भारतीय न्याय संहिता (BNS) तसेच बाल लैंगिक अत्याचार प्रतिबंधक कायदा (POCSO) अंतर्गत विविध कलमान्वये गुन्हा दाखल केला आहे.
रविवारी पहाटे सुमारे चार वाजता पोलिसांनी आरोपीला अटक केली. त्याला न्यायालयात हजर केले असता न्यायालयाने २० मार्चपर्यंत पोलीस कोठडी सुनावली आहे.
गावात संतापाची लाट
या घटनेमुळे संपूर्ण अहिल्यानगर जिल्ह्यात संताप व्यक्त केला जात आहे.पारनेर पोलिसांनी याप्रकरणी यशवंत एकनाथ थोरात विरुद्ध भारतीय न्याय संहिता (BNS) आणि बाल लैंगिक अत्याचार प्रतिबंधक कायदा (POCSO) च्या विविध कलमान्वये गुन्हा दाखल केला आहे. या घटनेमुळे संपूर्ण अहिल्यानगर जिल्ह्यात संताप व्यक्त होत असून, आरोपी यशवंत महाराज थोरात यांना पारनेर पोलिसांनी पहाटे चार वाजता अटक केली आहे या अशा 'भोंदू' महाराजावर कठोर कारवाई करण्याची मागणी ग्रामस्थांनी केली आहे.
0 Comments